स्थानीय किसानले उत्पादन गरेको तरकारी, फलफूल, हस्तकला तथा घरेलु उद्योगका सामग्री अब सिधै उपभोक्तासम्म पुग्ने भएका छन्। किसानको आम्दानी बढाउने र उपभोक्तालाई ताजा तथा स्वस्थकर उत्पादन सहज रूपमा उपलब्ध गराउने लक्ष्यसहित विदुर नगरपालिका ले कृषि हाटबजार सञ्चालनमा ल्याएको हो।
वडा नम्बर ४ बट्टारस्थित हावाघरमा आयोजित विशेष कार्यक्रममा नगरप्रमुख राजन श्रेष्ठ र उपप्रमुख प्रभा बोगटीले संयुक्त रूपमा हाटबजारको उद्घाटन गरेका छन्। नगरपालिकाका अनुसार, यस पहलले स्थानीय कृषि उत्पादनलाई उचित बजार दिलाउनुका साथै हस्तकला र घरेलु उद्योगका वस्तुहरूलाई पनि उपभोक्तासम्म सहज रूपमा पुर्याउनेछ।
नगरप्रमुख श्रेष्ठका अनुसार, किसानले आफ्ना उत्पादन बिक्री गर्न सहज वातावरण पाउने र उपभोक्ताले सहुलियत मूल्यमा ताजा सामग्री खरिद गर्न सक्ने उद्देश्यले यो बजार सुरु गरिएको हो। विशेषगरी बिचौलियाको भूमिका हटाएर किसान र उपभोक्ताबीच प्रत्यक्ष कारोबार गराउनेमा नगरपालिकाले जोड दिएको छ।
नयाँ व्यवस्था अनुसार हाटबजार अब नियमित रूपमा हप्तामा दुई दिन सञ्चालन हुनेछ। हरेक शनिबार वडा नम्बर ९ को कार्यालय परिसर (कोलनी) मा तथा हरेक आइतबार बिहान ७ बजेदेखि ११ बजेसम्म बट्टार हावाघरमा बजार लाग्नेछ।
नगरपालिकाले यसलाई स्थानीय अर्थतन्त्र सुदृढ बनाउने, किसानको उत्पादनलाई प्रोत्साहन गर्ने र उपभोक्तालाई गुणस्तरीय खाद्य सामग्री उपलब्ध गराउने दीर्घकालीन योजनाको सुरुआतका रूपमा लिएको जनाएको छ।
क्याटेगोरी : समाचार
ट्याग : #hot
थप समाचार
धेरै पढिएका
प्रतिक्रिया दिनुहोस