अन्तर्राष्ट्रिय मूल्यवृद्धिको असर: नेपालमा पेट्रोलियम पदार्थ महँगियो
अन्तर्राष्ट्रिय बजारमा लगातार मूल्य बढ्दै जाँदा त्यसको असर नेपाली उपभोक्तामाथि परेको छ। यही क्रममा नेपाल आयल निगमले पुनः पेट्रोलियम पदार्थको मूल्य वृद्धि गरेको छ, जसले आम नागरिकको दैनिक खर्चमा थप दबाब पर्ने देखिएको छ।
निगमले बुधबार मध्यरातदेखि लागू हुने गरी पेट्रोल, डिजेल र मट्टितेलको मूल्य प्रतिलिटर १५ रुपियाँले बढाएको हो। यसअघि पनि चैत १ गते मूल्य समायोजन गरिएको थियो, तर त्यसको ११ दिन नपुग्दै फेरि वृद्धि गरिएको हो।
नयाँ मूल्यअनुसार काठमाडौँमा पेट्रोल प्रतिलिटर १८७ रुपियाँ पुगेको छ। वर्गअनुसार निर्धारण गरिएको मूल्यमा पेट्रोल पहिलो वर्गमा १८४.५०, दोस्रोमा १८६ र तेस्रो वर्गमा १८७ रुपियाँ कायम गरिएको छ। त्यस्तै डिजेल र मट्टितेलको मूल्य पहिलो वर्गमा १६४.५०, दोस्रोमा १६६ र तेस्रो वर्गमा १६७ रुपियाँ निर्धारण गरिएको छ।
निगमका अनुसार अन्तर्राष्ट्रिय बजारमा मार्च १ देखि २४ तारिखसम्म पेट्रोलको खरिद मूल्य प्रतिलिटर ७६ रुपियाँ र डिजेलको १४३ रुपियाँले बढेकाले स्वदेशमा पनि मूल्य समायोजन गर्न बाध्य हुनुपरेको हो।
यो मूल्यवृद्धिले यातायात भाडादेखि उपभोग्य वस्तुको मूल्यसम्म असर पार्ने अनुमान गरिएको छ, जसले उपभोक्ताको जीवनयापन अझ महँगो बनाउने संकेत देखिएको छ।
क्याटेगोरी : समाचार
थप समाचार
धेरै पढिएका
प्रतिक्रिया दिनुहोस