नुवाकोटमा जारी निषेधाज्ञा जेठ १८ गते राती १२ बजे सम्म लम्बिने भएको छ । जिल्ला संकट व्यवस्थापन केन्द्र (डीसीसीएमसी) को बैठकले कोरोना संक्रमणको फैलावट बढ्दो क्रममा रहेको भन्दै निषेधाज्ञा लागेको हो ।
यसअघि जारी गरिएको निषेधाज्ञा सोमबार राति १२ बजे बाट सकिँदै छ । जिल्लामा कोरोना संक्रमणको फैलावट बढ्दो क्रममा रहेको पुष्टि गर्दै डीसीसीएमसीको बैठकले निषेधाज्ञाको समय थप गर्न निर्णय गरेको हो । जस अनुसार जेठ १८ गते राति १२ बजेसम्म निषेधाज्ञा थप गरिने भएको छ ।
डीसीसीएमसीको निर्णय अनुसार स्थानीय प्रशासन ऐन २०२८ को दफा ६ को उपदफा (३) र संक्रामक रोग ऐन २०२० को दफा (२) बमोजिम जारी गरिएको निषेधाज्ञा, अझै संक्रमणको अवस्था नियन्त्रणमा आइनसकेको हुँदा जेठ १८ गतेसम्मका लागि निरन्तरता दिने जिल्ला प्रशासन कार्यालयले जनाएको छ ।
निर्णयमा निषेधाज्ञा उलंघन गरेर हिँड्नेलाई संक्रामक रोग ऐन अनुसार कारवाही गर्न र नियमन गर्न जिल्लाका प्रहरी युनिटलाई निर्देशन दिएको छ । अत्यावश्क खाद्य सामग्री, तरकारी, फलफूल, औषधि (भेटनरी समेत) र स्वास्थ्य सामग्री सम्बन्धी पसल व्यवसाय नेपाल सरकारले तोकेको स्वास्थ्य मापदण्डको पूर्ण रुपमा पालना गरी विहान १० बजे सम्ममात्र खुल्ला गर्न निर्देशन दिएको छ ।
नुवाकोटमा आइतबार सम्म कोरोनाका कारण त्रिशुली आस्पतालमा ८ जनाको मृत्यु भएको छ भने ६ सय ९३ जना सक्रिय संक्रमित छन् । यस्तै संक्रमित संख्या २ हजार ६६ पुगेको छ भने कोरोन मुक्त भएर घर फर्किनीको संख्या १ हजार ३ सय ६५ जना रहेको स्वास्थ्य कार्यालय नुवाकोटले जनाएको छ ।
क्याटेगोरी : समाचार
ट्याग : #hot
थप समाचार
धेरै पढिएका
प्रतिक्रिया दिनुहोस