एकपटक फेरि क्रान्ति गर्छु : प्रचण्ड

नेकपा माओवादी केन्द्रका अध्यक्ष पुष्पकमल दाहाल प्रचण्डले देशमा एकचोटि फेरि क्रान्ति र नयाँ विद्रोह आवश्यक भएको धारणा व्यक्त गरेका छन्। पेरिसडाँडामा शहीदहरूको सम्झनामा आयोजित कार्यक्रममा उनले प्रतिक्रियावादी शक्तिहरूले षडयन्त्र गरिरहेको भन्दै एकताबद्ध भएर त्यसको प्रतिरोध गर्न आह्वान गरे।

प्रचण्डले भने, “हामी जनयुद्ध, शान्ति प्रक्रिया, संविधानसभा हुँदै यहाँसम्म आइपुग्दा अझै पनि जीवित रहेका छौं, र नेतृत्वको भूमिकामा पनि रहेको छौं। यसैले, एकचोटि फेरि क्रान्ति र नयाँ विद्रोहको आवश्यकता परेको छ।” उनले थपे, “हामी बल गर्दैछौं, एकताबद्ध भएर प्रतिक्रियावादीहरूको षडयन्त्रको प्रतिरोध गर्ने कोसिस गर्दैछौं।”

प्रचण्डले आफूले जनयुद्धको तयारी, शान्ति सम्झौता, र संविधानसभा प्रक्रियामा भाग लिएको कुरामा भावुक हुँदै भने, “अब हाम्रो प्रतिबद्धता नयाँ विद्रोहको माध्यमबाट प्रतिक्रियावादीलाई परास्त गर्ने छ।”

साथै, उनले शान्ति प्रक्रियाका बाँकी कामलाई अघि बढाउँदै यसमा पनि चलखेल भइरहेको दाबी गरे। उनले थपे, “विषय अघि बढिरहेको छ, तर यसमा पनि चलखेल भइरहेको छ। हामीले एकताबद्ध नभए अप्ठेरो आउन सक्छ।” प्रचण्डले उपस्थित सबैलाई अपील गर्दै एकता कायम राख्नको लागि सचेत गराए।

अध्यक्ष प्रचण्डले जनयुद्धलाई राष्ट्रिय दिवसको रूपमा आत्मसाथ गर्नुपर्ने आवश्यकता रहेको बताउँदै यसलाई अदालतको विषय नमान्ने बताएका छन्। उनका अनुसार, “जनयुद्धको सम्झनामा हामीले यसलाई राष्ट्रिय दिवसको रूपमा मान्नुपर्छ।”