नुवाकोटको जनमतले पुष्टि गरेको नयाँ राजनीतिक युग

केदार ढकाल फागुन ३० २०८२, शनिबार ०७:४७

नेपालको लोकतान्त्रिक अभ्यासमा प्रत्येक निर्वाचन केवल प्रतिनिधि चयन गर्ने औपचारिक प्रक्रिया मात्र होइन; यो जनताको सोच, अपेक्षा र राष्ट्रको भविष्यप्रतिको दिशानिर्देश पनि हो। हाल सम्पन्न प्रतिनिधिसभा निर्वाचनमा नुवाकोटका जनताले व्यक्त गरेको जनमतले राष्ट्रिय स्वतन्त्र पार्टीप्रति गहिरो विश्वास, परिवर्तनप्रतिको तीव्र चाहना र जिम्मेवार राजनीतिक नेतृत्वको खोजीलाई स्पष्ट रूपमा अभिव्यक्त गरेको छ।
यसपटक नुवाकोट जिल्लाले राष्ट्रिय स्वतन्त्र पार्टीलाई प्रदान गरेको व्यापक जनसमर्थन कुनै सामान्य राजनीतिक परिणाम होइन। यो वर्षौंदेखि स्थापित परम्परागत राजनीतिक संरचनाप्रतिको समीक्षा, नयाँ सोचप्रतिको आकर्षण र वैकल्पिक नेतृत्वप्रतिको स्पष्ट भरोसाको परिणाम हो। जिल्लाका गाउँ–नगर, बस्ती तथा समुदायसम्म पुगेर जनतासँग गरिएको प्रत्यक्ष संवाद, संगठन निर्माणमा गरिएको निरन्तर मेहनत तथा पार्टी पंक्तिका निष्ठावान कार्यकर्ताहरूको अथक परिश्रमले आजको यो उपलब्धिलाई सम्भव बनाएको हो।
निर्वाचनमा प्राप्त सफलता आकस्मिक थिएन। राष्ट्रिय स्वतन्त्र पार्टीले प्रारम्भदेखि नै स्पष्ट राजनीतिक विश्लेषण, मतदाताको मनोविज्ञान, संगठनको अवस्था तथा क्षेत्रगत प्रभावको सूक्ष्म अध्ययनका आधारमा चुनावी रणनीति निर्माण गरेको थियो। क्षेत्र नम्बर २ मा १२ देखि १५ हजार मतान्तर र क्षेत्र नम्बर १ मा ४ देखि ७ हजार मतान्तर रहने आन्तरिक आकलनसहित पार्टी चुनावी मैदानमा प्रवेश गरेको थियो। अन्ततः प्राप्त परिणामले त्यस विश्लेषणको यथार्थतालाई पुष्टि गरेको छ।
यसले एउटा महत्वपूर्ण सन्देश स्थापित गरेको छ— निर्वाचन केवल नाराले जितिँदैन; विचार, रणनीति, संगठनात्मक शक्ति र सक्षम नेतृत्वले जितिन्छ। युवा नेतृत्वको सक्रियतामा अघि बढिरहेको नुवाकोट जिल्ला समितिभित्र राजनीतिक अनुभव, परिस्थितिको सूक्ष्म मूल्यांकन गर्ने क्षमता तथा दीर्घकालीन राजनीतिक दृष्टिकोण रहेको तथ्य यस परिणामले प्रमाणित गरेको छ।
आज नुवाकोटले साझा नेतृत्व पाएको छ। निर्वाचनमा हार–जित लोकतान्त्रिक प्रक्रियाको स्वाभाविक पक्ष हो, तर निर्वाचित प्रतिनिधि सम्पूर्ण जिल्लावासीका साझा प्रतिनिधि हुन् भन्ने लोकतान्त्रिक मान्यतालाई हामी दृढतापूर्वक स्वीकार गर्दछौँ। जसले मतदान गर्नुभयो, जसले फरक मत राख्नुभयो, जसले समर्थन गर्नुभयो वा नगर्नुभयो— सबै नागरिक समान सम्मानका अधिकारी हुनुहुन्छ।
राष्ट्रिय स्वतन्त्र पार्टीको आधारभूत सिद्धान्त स्पष्ट छ— राज्य सञ्चालनमा कसैलाई काखा र कसैलाई पाखा गरिने छैन। पार्टीगत निकटता वा दूरीका आधारमा अवसर र व्यवहार फरक पार्ने संस्कार अब स्वीकार्य छैन। नुवाकोटका सबै नागरिकलाई समान दृष्टिले हेर्ने, समान अवसर प्रदान गर्ने र समान न्याय सुनिश्चित गर्ने प्रतिबद्धता हाम्रो रहनेछ।
हामी यो पनि स्पष्ट गर्न चाहन्छौँ कि राष्ट्रिय स्वतन्त्र पार्टी कुनै पनि प्रकारको गलत काम, अनियमितता, दुरुपयोग वा अन्यायप्रति मौन बस्ने पार्टी होइन। गलत गर्ने जोसुकै भए पनि विधि र कानूनको दायराभित्र ल्याउने दृढता हाम्रो संगठनमा छ। साथै अन्यायमा परेका, आवाजविहीन भएका र राज्यबाट उपेक्षित नागरिकहरूको पक्षमा सधैं अग्रसर रहनु हाम्रो राजनीतिक जिम्मेवारी हो।
यस ऐतिहासिक सफलतामा नुवाकोट जिल्लाभित्र रहेका सम्पूर्ण संगठनहरूको भूमिका अत्यन्त महत्वपूर्ण रहेको छ। वडा तहदेखि क्षेत्रीय समिति, स्वयंसेवक समूह, युवा शक्ति, वैचारिक अभियानमा सक्रिय सम्पूर्ण साथीहरू तथा प्रत्यक्ष रूपमा जनतासम्म पार्टीको दृष्टिकोण पुर्‍याउने प्रत्येक कार्यकर्ता हार्दिक बधाईका पात्र हुनुहुन्छ।
निष्ठा, धैर्यता, अनुशासन र समर्पणले निर्माण गरेको यो उपलब्धि केवल वर्तमानको विजय मात्र होइन, भविष्यको ठूलो जिम्मेवारी पनि हो। जनताले दिएको विश्वासलाई व्यवहारमा रूपान्तरण गर्नु, सुशासन, पारदर्शिता र उत्तरदायित्वलाई संस्थागत गर्नु अब हाम्रो पहिलो दायित्व हुनेछ।
नुवाकोटले राष्ट्रिय स्वतन्त्र पार्टीलाई दिएको यो विश्वास इतिहासमा नयाँ राजनीतिक अध्यायका रूपमा स्मरणीय रहनेछ। अबको यात्रा अझ जिम्मेवार, अझ उत्तरदायी र अझ परिणाममुखी हुनेछ।
अन्त्यमा, सम्पूर्ण मतदाता, पार्टी पंक्ति, शुभेच्छुक, निष्ठावान कार्यकर्ता तथा परिवर्तनको पक्षमा उभिनुभएका सम्पूर्ण नुवाकोटवासी जनसमुदायप्रति हार्दिक धन्यवाद व्यक्त गर्दछु।
शिवराज लामिछाने
जिल्ला सचिव
राष्ट्रिय स्वतन्त्र पार्टी, नुवाकोट