शिवराज लामिछने : सचिव ,रास्वपा नुवाकोट ।
उम्मेदवारीको टिकट वितरण प्रक्रियामा सबैको अपेक्षा पूरा नहुन सक्छ। त्यसबाट केही असन्तुष्टि र पीडा उत्पन्न हुनु स्वाभाविक हो। तर यस्ता अवस्थालाई स्वार्थ, चलखेल र बाठोपनको माध्यम बनाउँदै पार्टीको मूल्य–मान्यता तथा जनताको भरोसामाथि चोट पुर्याउने प्रयास गरिए, त्यसको राजनीतिक मूल्यांकन समयले अवश्य गर्छ। यस्ता प्रवृत्तिहरू इतिहासको कठघरामा उभिनैपर्छन्।
तर अहिले हाम्रो प्राथमिकता व्यक्तिगत असन्तुष्टि होइन, देशको भविष्य हो। कुशासन, भ्रष्टाचार र पुरानो सत्ताको जडतालाई अन्त्य गर्दै सुशासन, जवाफदेहिता र विकासको नयाँ मार्ग खोल्नु आजको आवश्यकता हो। यही उद्देश्यका लागि राष्ट्रिय स्वतन्त्र पार्टी जन्मिएको हो, र यही संकल्पलाई जनताको विश्वास र जितमा रूपान्तरण गर्नु हाम्रो साझा जिम्मेवारी हो।
आगामी निर्वाचनमा नुवाकोट क्षेत्र नम्बर १ र २ मा घन्टीको जित सुनिश्चित गर्नु भनेको कुनै व्यक्तिको विजय होइन, विचार र दृष्टिकोणको विजय हो। यो रोजगारी सिर्जना गर्ने नीति, उत्पादनमुखी अर्थतन्त्र, गुणस्तरीय शिक्षा र स्वास्थ्य सेवा, न्यायपूर्ण राज्य व्यवस्था तथा युवालाई आफ्नै देशमा भविष्य देखाउने अभियानको जित हो।
त्यसैले, कोही पनि विचलित नबनौं। व्यक्तिगत गुनासो र असन्तुष्टिलाई थाती राखी राष्ट्रिय स्वतन्त्र पार्टीलाई विजयी बनाउने साझा लक्ष्यका साथ हातेमालो गर्दै एकताबद्ध रूपमा अगाडि बढौं। आजको हाम्रो एकता नै भोलिको समृद्ध, सक्षम र न्यायपूर्ण नेपालको बलियो आधार हो।
अबको बाटो स्पष्ट छ—विवाद होइन, निराशा होइन, राष्ट्र निर्माण। यही भावनाका साथ राष्ट्रिय स्वतन्त्र पार्टीलाई जनताको आशा र भरोसाको केन्द्र बनाउँदै अगाडि बढ्नु आजको अपरिहार्य आवश्यकता हो।
क्याटेगोरी : विचार / ब्लग
थप समाचार
धेरै पढिएका
प्रतिक्रिया दिनुहोस