त्रिशुली सहकारीले सदस्यहरुलाई रोजगार बनाउन २० लाख बजेट छुट्टायो

केदार ढकाल असोज १४ २०८०, आईतबार १४:४०

सामाजिक उत्तरदायित्व अन्तर्गत रहेर त्रिशुली बचत तथा ऋण सहकारी संस्था लिमिटेडले ४ जना विद्यार्थीलाई छात्रवृत्ति प्रदान गरेको छ ।

सहकारीको २३औँ साधारण सभाको अवसरमा त्रिभुवन त्रिशुली बहुमुखी क्याम्पसमा अध्ययनरत अमित लामा तामाङ, सबिना चालिसे, वेलकोटगढी नगरपालिका–७ रातमाटे स्थित महादेव माध्यमिक विद्यालयमा अध्ययनरत नमृका रिमाल र शिलादेवी माध्यमिक विद्यालयमा अध्ययनरत रोहन लघुन सुनारलाई छात्रवृत्ति प्रदान गरिएको हो । छात्रवृत्ति प्राप्त विद्यार्थीहरुलाई जनही ७ हजार रुपैयाँ प्रदान गरिएको हो ।

यस्तै सहकारीको शेयर सदस्यको सन्तानहरु मध्ये माध्यमिक शिक्षा परीक्षा (एसईई) उत्कृष्ट अंक सहित उतीर्ण ४ जनालाई नगद पुरस्कार सहित सम्मान गरेको छ ।

सम्मान प्राप्त गर्नेहरुमा आयुसा श्रेष्ठ, ग्रिस श्रेष्ठ, सुकृति श्रेष्ठ र प्रेरणा श्रेष्ठ रहेको सहकारीका सचिव राजेश श्रेष्ठले बताउनुभएको छ । सहकारीको दिगोपन, स्वनियमन र शुसासन भन्ने नारा सहित विसं २०५६ सालमा स्थापना भएको सहकारीले २३औँ वार्षिक साधारण सभाको अवसरमा ४ जनालाई उच्च शिक्षा सम्मान समेत गरेको छ ।

डाक्टर राजिव श्रेष्ठ, बासुदेव जोसी, डाक्टर उन्नती अमात्य र श्यामलाल श्रेष्ठलाई उच्च शिक्षा सम्मान गरिएको सहकारीका सचिव श्रेष्ठले बताउनुभएको छ । यस्तै ७० वर्ष पूरा हुनुभएका ६ जना शेयर सदस्यलाई अभिनन्दन गरिएको छ । ध्रवलाल श्रेष्ठ, अमृतमान मल्ल, रामकृष्ण राजभण्डारी, भद्रजंग पाण्डे, दिलमायाँ डंगोल र रत्नमायाँ अमात्यलाई जेष्ठ नागरिक अभिनन्दन कार्यक्रममा सहभागी गराइएको थियो । सम्मानित जेष्ठ नागरिक सदस्य कुलबहादुर बोगटीको प्रमुख आतिथ्यतामा सम्पन्न साधारण सभामा जिल्ला सहकारी संघका लेखा संयोजक नारायण श्रेष्ठले सहकारीहरुलाई मितव्ययी बनाउँन अनुगमनको कार्यक्रमलाई तिब्रता दिइरहेको बताउनुभएको छ । नुवाकोट जिल्ला बचत तथा ऋण सहकारी संघका सचिव नविन्द्रमान प्रधानले ऋणीहरु कालो सूचीमा पर्ने दर बृद्धि भइरहेकोले सहकारी संचालकसँगै ऋणी पनि सचेत हुनुपर्नेमा जोड दिनुभएको छ । यस्तै राष्ट्रिय सहकारी वैक नुवाकोट शाखा प्रवन्धक प्रदिप अर्यालले सहकारीलाई दिगोपना दिनको लागि सहकारी संचालक चनाखो हुनुपर्ने बताउनुभएको छ ।

कार्यक्रममा त्रिशुली अस्पताल व्यवस्थापन समितिका अध्यक्ष राजु पण्डित, वेलकोटगढी नगरपालिका वडा नम्बर ७ का वडा सदस्य गमला लामा, पोष्टबहादुर बोगटी बहुप्राविधिक शिक्षालयका प्रशासनिक प्रमुख महेन्द्र श्रेष्ठ, उच्च शिक्षाबाट सम्मानित बासुदेव जोसी र श्यामलाल श्रेष्ठ लगायतले सहकारीले समाजिक उत्तरदायित्व अन्तर्गत रहर संचालन गर्ने कार्यहरु लोभलाग्दो रहेको बताउनुभएको छ । सहकारीको २३औँ साधारण सभामा अध्यक्ष हरिराल श्रेष्ठले वार्षिक प्रतिवेदन, लेखा तथा सुपरिवेक्षण समितिका संयोजक उपेन्द्र अमात्यले लेखा तथा सुपरिवेक्षण समितिको प्रतिवेदन र कोषाध्यक्ष नाथलाल डंगोलले लेखा परिक्षण प्रतिवेदन प्रस्तुत गर्नुभएको थियो । अध्यक्ष श्रेष्ठले शेयर सदस्यहरुको आवस्यकता परिपूर्ति गर्नका लागि आवस्यकताको आधारमा व्यवसायिक पुनस्थापनामा सहकार्य गर्न सहकारी प्रतिबद्ध रहेको बताउनुभएको छ । कोषाध्यक्ष डंगोलले सहकारीको शेयर सदस्य १६ सय ७२ जना रहेको र ४ करोड ११ लाख ४४ हजार ५ सय रुपैयाँ शेयर पूँजी रहेको बताउनुभएको छ । सहकारीले ४० करोड रुपैयाँको हारहारीमा कारोबार गरिरहेको उहाँको भनाई छ । नुवाकोट जिल्लाभर कार्य क्षेत्र बनाएर काम गरिरहेको त्रिशूली बचत तथा ऋण सहकारी संस्थाले त्रिशूली बजारमा अबस्थित आफ्नै भवनबाट सेवा संचालन गर्दै आइरहेको छ । वेलकोटगढी नगरपालिका वढा नम्बर ७ मा सेवा केन्द्र संचालनमा ल्याइसकेको सहकारीले १० गाउँपालिकामा क्रमिक रुपमा सेवा केन्द्र संचालनमा ल्याई आफ्नो कारोवार बिस्तार गर्ने लक्ष्य लिएको छ ।