प्रथम खुल्ला फुटसल प्रतियोगिता सम्पन्न’
फुटसल प्रतियोगितामा सुकेधारास्थित 'काया कर्प क्लब' ट्राईब्रेकरमा ४–३ को गोल अन्तरले बूढानीलकण्ठस्थित 'फ्रीडम फाइटर क्लब'लाई हराउँदै विजयी भएको हो ।
चिरञ्जीवी नेपाल, काठमाडौँ ।
बूढानीलकण्ठस्थित गाम्चा फुटबल क्लबले तिहारको अवसरमा प्रथम खुल्ला फुटसल प्रतियोगिता सम्पन्न गरेको छ ।
फुटसल प्रतियोगितामा सुकेधारास्थित ‘काया कर्प क्लब’ ट्राईब्रेकरमा ४–३ को गोल अन्तरले बूढानीलकण्ठस्थित ‘फ्रीडम फाइटर क्लब’लाई हराउँदै विजयी भएको हो ।
बूढानीलकण्ठस्थित भद्रकाली फुटसल एण्ड रि-क्रियशन सेन्टरमा भएको प्रतियोगितामा काया कर्प क्लबका ‘सञ्जीव तामाङ’ उत्कृष्ट गोल रक्षक घोषित भएका छन् । त्यस्तै, फ्रीडम फाइटर क्लबका ‘अर्जुन श्रेष्ठ’ उत्कृष्ट खेलाडी घोषित भएका छन् ।
प्रतियोगिताको समापन समारोहमा विजयी समूहलाई पूर्व स्वास्थ्य मन्त्री, सङ्घीय सांसद एवं नेपाली काङ्ग्रेसका केन्द्रीय सदस्य गगनकुमार थापाले खेल सकिएलगत्तै सोही स्थानमा पुरस्कार वितरण गर्नुभएको थियो ।
प्रथम विजेताले ट्रफी, मेडल र प्रमाणपत्रसहित ३० हजारको चेक, उप-विजेताले ट्रफी, मेडल र प्रमाणपत्रसहित २० हजारको चेक तथा अन्य विधाका विजेताहरूले ट्रफी, मेडलसहित प्रमाणपत्र प्राप्त गरेका छन् ।
फुटसल प्रतियोगिता सफल बनाउन विभिन्न सङ्घसंस्था एवं समाजसेवी व्यक्तिहरूले सहयोग गरेका थिए । कात्तिक १७ र १८ गते दुई दिन भएको उक्त प्रतियोगितामा ३६ वटा क्लबका ३६ वटा समूहले सहभागिता जनाएका थिए ।
गाम्चा फुटबल क्लबका अध्यक्ष ‘रामचन्द्र श्रेष्ठ’को सभापतित्वमा भएको फुटसल समापन समारोहका प्रमुख अतिथि पूर्व स्वास्थ्यमन्त्री एवं सङ्घीय सांसद ‘गगनकुमार थापा’, विशेष अतिथिहरू बागमती प्रदेश लेखा समिति सभापति न्हुच्छे नारायण श्रेष्ठ’ र बागमती प्रदेश लोकतान्त्रिक खेलकुद सङ्घका सभापति ‘दिपक गुरुङ’ हुनुहुन्थ्यो ।
बूढानीलकण्ठ वडानम्बर-१३ स्थित गाम्चामा रहेको ‘गाम्चा फुटबल क्लब’ले फुटबलको स्तरोन्नतिका साथै विभिन्न सामाजिक कार्यहरूमा समेत अग्रसरता देखाइरहेको छ ।
क्लबले समाजमा देखिने विकृति, विसङ्गतिविरुद्ध आवाज उठाउँदै, सामाजिक सचेतनालगायतका कार्यहरू पनि गर्दै आएको छ । क्लबको मुख्य लक्ष्य राष्ट्रिय स्तरको फुटबल खेलाडी उत्पादन गर्ने रहेको क्लबका कोषाध्यक्ष संकल्प श्रेष्ठले नुवाकोट अनलाइनलाई बताउनुभयो ।
क्याटेगोरी : खेलकुद, समाचार
ट्याग : #hot 100
थप समाचार
धेरै पढिएका
प्रतिक्रिया दिनुहोस