प्रश्नहरु
ढाकाटोपी
दौरासुरुवालमा ठाट्टिएर
गलाभरी सयपत्रीको माला भिरेर
दुबैहात जोडि
यज्ञ मण्डपमा पूजा गरिरहेको
स्वयं कार्ल मार्क्सको
चित्र बनाउदा
कस्तो देखिन्छ होला ?
उट्पट्याङ प्रश्न
जन्मिन्छ
छोडेर उतै
दुर दराजमै
अनिकाल , अशिक्षा र गरिबी
सुटुक्क काठमाडौ छिरेको
भुतपुर्व कमान्डरले
उहि पुरानो जङ्गि अड्डाको
परेड देखाएर टुडिखेलमा
भोकाहरुलाई तर्साएको
एनिमेटेड भिडियो तस्बिर
बनाउन पाए
कति दर्शक हसाउन सकिन्छ ?
वाहियात प्रश्न गर्न मन लाग्छ
लगाएर डढेलो
बस्तिमा बिद्रोहको
आफु सुटुक्क मन्दिरमा पसेर
ईश्वरको नाममा
किरिया खाइरहेको
जङ्गी क्रान्तिकारीको फोटो
डिजिटल क्यामराले खिचेर
दोबाटोमा झुन्ड्याउन पाए
कस्तो हुन्थ्यो होला ?
बेकारको प्रश्नले टाउको खान्छ
जे जे भनेपनी कमान्डरले
खुरुखुरु
क्रान्तिकारी स्वीकार गर्ने,
हातमा फुलका गुच्छा बोकेर
“बधाई तपाईंलाई
सबैलाई उल्लू बनाउनुभो
आफै चकित पर्नेगरी बदलिनु भो
हामी सबैलाई
आफ्नै गोठका भेडा बनाउनुभो ”
भन्दै फेरि
बदलिएको कामरेडलाई
बदलिदो शुभकामना दिदै
उसैको छेउमा उभिएर
मुसुक्क हास्दै
खिचेर सेल्फी
फेसबुकमा अपलोड गर्दा
म आफै
कुन स्तरको
जोकर बन्छु होला ?
यो हास उठ्दो प्रश्न
बिजुली चम्किएझै आउछ
जे होस
वाहियात भए पनि
उटपट्याङ भएपनी
बेकारको भएपनी
हास उठ्दो भएपनी
टाउको हुनेले प्रश्न गरि रहनु पर्छ
यि प्रश्नहरू प्रश्नहरूनै हुन ।
मणि काफ्ले
क्याटेगोरी : समाचार
थप समाचार
धेरै पढिएका
प्रतिक्रिया दिनुहोस